Plantun de Prouvènço

Pèr coumpara dos planto d'encò nostre

Myosoton aquaticum & Lycium barbarum

Esteleto(-d'aigo)

Myosoton aquaticum

Caryophyllaceae

Autre noum : Ceraiste(d'aigo).

Noms en français : Céraiste aquatique, Malaquie.

Descripcioun :
L'estelleto-d'aigo, di proun raro au nostre (subretout en pau long dóu Rose), trachis sus li limas en ribo d'aigo. Douno proun d'èr à un Stellaria emé si petalo di dos partido, pamens se n'en destrìo seguramen que i'a 5 estile e noun pas 3 à la flour (vèire li fotò). La planto èi proun peludo emé de péu glandoulous e li bratèio soun sènso pecou coume li fueio d'en aut.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 60 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Myosoton
Famiho : Caryophyllaceae

Ordre : Caryophyllales

Coulour de la flour : Blanco
Petalo : 5
Ø (o loungour) flour : 1,5 à 1,8 cm
Flourido : Printems - Estieu

Sòu : Ca
Autour basso e auto : 0 à 1200 m
Aparado : Noun
Jun à setèmbre

Liò : Limas - Ribiero
Estànci : Termoumediterran à Subaupen
Couroulougi : Éurosiberiano
Ref. sc. : Myosoton aquaticum (L.) Moench, 1794 (= Stellaria aquatica (L.) Scop., 1771 = Cerastium aquaticum L., 1753 )

Arnavèu-blanc(-de-Barbarìo)

Lycium barbarum

Solanaceae

Autre noum : Bouissoun-blanc.

Nom en français : Lyciet commun.

Descripcioun :
L'óurigino éuroupenco d'aquest arnavèu-blanc èi discutido. Sèmblo pèr la maje part planta. Es un aubret que fai de flour vióuleto sus de ramo retoumbanto e espinouso. Lycium europaeum a de flour palinouso e d'espinasso alor que Lycium chinense fai de flour mai larjo e porto ges d'espino.

Usanço :
Emai li fueio e li fru sarien manjadis (F. Couplan, op.cit. p. ) cue, soun subretout li fru que soun utilisa en medecino tradiciounalo chinese emé lou noum de "goji". Soun proun anti-óussidant e manja pèr faire dura d'alòngui la vido (paradis terrestre di taouïste). Èi vertuous contre un fube de malautié : anti-cancerous, bon pèr lou cor, contro l'ipertesuro, l'iperglicemìo, lis artèri tapado...